ما سمعتش آخر خبر

ما سمعتش آخر خبر

قولتله قديمة ... بيبو فرقع جيجي

قالي : يااااااااه ده انت قديم قوي .. يا ابني انت محتاج " أب ديت " علشان تواكب العصر

قلتله خلاص خلاص .. عرفت ... حمادة بيحب غادة .. وهي بتحب هاني

بص لي من فوق لتحت

وقالي لأ ... شكلك مش مثقف

-قلتله: أنا ؟ و الله ابدا .. ده انا موس قراية ... بس انا اللي مش باين عليا

- قالي :انت شكلك مش من البلدي

قلتله :... لاااااااااااااا و ألف لاااااااااااا .. انا مصري و ابويا مصري ...

و النيل جواه بيسري .. لولاش بس البلهارسيا اللي عملت فيا كده

قالي: يا عم انت مش حاسس باللي بيحصل ف البلد

قلتله: يا عم و الله حاسس ...

بس خايف اتكلم لاروح ف داهية ... البلد بتتباع ... و بتتنهب ... و بتتـ ...

حط ايده على بقى و كتم نفسي

و قالي ... عندك أنا بتكلم عن حاجة تانية خالص ... ده انت نيله قوي

قلتله :ايه يا عم قول ...

قالي : موبينيل باعت الشبكة القديمة بالقرد ... وجابت شبكة جديدة من غير قرد ..

- قلتله : يا راااااجل ... من امتى الكلام ده ؟؟؟

- قالي : يا عم من فترة ... مش باقولك انت مش ف البلد

قلت اجرب الموضوع ده

طلعت الموبايل من درج النيش و مسحت التراب من عليه و ضربت

رقم واحد صاحبي

لقيت نفس الست الرخمة اللي مزهقاني ف عيشتي بتقولي نفس البق الحامض اياه

الرقم الذي طلبته غير متاح حاليا

وصاحبه ربما يكون معتقلا أو مسجونا

كررت المحاولة ... و الست برضه ما بتزهقش ... نفس الجملتين

طب تاني يوم ... خطأ ف الإرسال

طب تالت يوم ... الشبكة مشغولة

طب رابع يوم

طب خامس

الله

امال فين الشبكة الجديدة ؟؟؟

هو بأمانة صوت الصفارة ساعت الرنين اتغيرت

لكن باقي البلاوي و حتى سرقة الرصيد

هي هي

ما اتغيرتش

انا بصراحة كنت شاكك ف القرد ان هو اللي بيسرق الرصيد

بس اهم باعوه ... و لسه الرصيد بيتسرق

يبقى العيب فييييييييييين ؟؟؟

المهم اني قعدت افكر

ف الشبكة الجديدة

و مميزاتها

و الجديد فيها

ما لقيتش غير حاجتين اتنين

انهم غيروا الصفارة

و باعو القرد اللي كان بيتكلم

و بكده يتفضلهم إنجاز واحد يا رب يقدروا يحققوه

انهم يبيعوا كمان قرد

بقاله أكتر من 25 سنة بيتكلم ......بيتكلم وبس

هههههههه